La tur cotschna sin il Pass dal Güglia duai restar enfin l'avust dal 2023. Il festival cultural Origen ha inoltrà ina dumonda da prolungaziun. Oriundamain era planisà che la tur cotschna restia mo enfin la fin da quest onn.
Transiziun fin ch'i dat novs bajetgs
La fundaziun Origen planischa d'ereger e da nizzegiar spazis culturals alternativs en ils vitgs dal Surses che duain lura cumpensar la tur sin il Güglia. Els dovrian questa tur ils proxims trais onns fin ch'ils spazis novs sajan pronts, scriva la fundaziun.
2023 èsi definitiv a fin
Suenter il 2023 giaja er a fin la soliditad natirala da la tur, ha accentuà l'intendant Giovanni Netzer. La tur sin il Güglia saja in bajetg temporar. Suenter il temp d'existenza (2017 - 2023) sa mussian er emprims donns vid l'implant che pretendian da dismetter la tur. Tschertas parts da la tur (laina, glas, installaziuns electricas e tecnica da tribuna) vegnian duvradas en las novas infrastructuras.
