Siglir tar il cuntegn

Header

Il spital da Tusaun.
Legenda: Il spital da Tusaun ha investì e vul attrair dapli pazients en la regiun. RTR, Federico Belotti
cuntegn

Ospital da Tusaun Quint annual serra danovamain cun deficit

L’ospital da Tusaun ha fatg in deficit da 578’582 francs l’onn 2018. Las expensas da gestiun muntan a 20’666'899 francs. Gia l’onn avant aveva l'ospital fatg circa la medema sperdita. Quella vegn mintgamai pajada da las vischnancas da la regiun d’ospitals.

Sco quai ch’il directur da l'ospital Reto Keller ha ditg envers RTR, hajan ins il 2018 bain gì in bun onn cun blers pazients, ma blers dals cas sajan stads plitost cas pli levs che portian pli paucas entradas ch’ils cas pli grevs. Quai haja tranter auter era da far cun il bun enviern cun fitg bunas pistas, uschia ch’igl haja dà pli paucs accidents sin pista che durant auters onns.

Reto Keller, il directur dal spital Tusaun.
Legenda: Reto Keller, il directur dal spital Tusaun. RTR, Federico Belotti

Fatg diversas investiziuns

L’onn 2018 hajan ins fatg diversas investiziuns en l'ospital, per exempel in nov salv d’urgenza e novs salvs per terapias – tge che laschia sperar ch’i dettia dapli pazients en l’avegnir. Quitads fetschia il mument il fatg che bleras operaziuns stoppian ozendi vegnir fatgas a moda ambulanta, vul dir ils pazients na pernotteschan betg pli en l'ospital. Quai muntia ch’i dettia oz per tschertas operaziuns mo pli in terz da l'import da pli baud, ha ditg il directur.

Naginas mesiras da spargn pli grondas

Grondas mesiras da spargn na sajan betg planisadas per l’avegnir, optimaziuns dettia quai plitost pitschnas. Era na dovria il proxim temp naginas investiziuns pli grondas. En l’avegnir veglian ins empruvar da far dapli cooperaziuns, per exempel èsi planisà da fusiunar cun la Spitex Viamala sin l’entschatta da l’auter onn. Ina cooperaziun saja er planisada cun l'ospital da Savognin, uschia Reto Keller.

RR novitads 06:00