Ospital da Tusaun sa dosta

La suprastanza communala da la vischnanca Albula/Alvra propona al suveran da sa participar en l'avegnir a la regiun d’ospitals Surses e da sa distatgar da Tusaun. L’ospital da Tusaun sa dosta cunter questa proposta.

Actualmain appartegnan mo Mon e Stierva a la regiun d'ospitals Savognin; sch'i va tenor la veglia da la suprastanza communala Albula/Alvra duai en l'avegnir l'entira vischnanca midar la regiun vers il Surses. Bild in Lightbox öffnen.

Legenda da maletgs: Actualmain appartegnan mo las vischnancas da Mon e Stierva a la regiun d'ospitals Savognin; en il futur pudessan quai... Grafica - RTR

L’ospital da Tusaun ha scrit als abitants da Casti, Alvaschagn, Alvagni, Brinzauls e Surava ina brev. Là descriva l’ospital ils avantatgs che l’ospital ha per la vischnanca Alvra. Plinavant na saja betg vair, che l’ospital da Tusaun custia dapli al pajataglia che l’ospital da Savognin.

Tenor il messadi da la vischnanca Albula/Alvra faschessi senn, da sa participar en avegnir a la regiun d’ospitals Surses. Per l’ina per mantegnair plazzas da lavur en la regiun ed uschia rinforzar la regiun, e per l’autra pretendian las structuras da l’ospital da Tusaun ina participaziun da las vischnancas al deficit annual.

Roland Weber, il president dal cussegl da fundaziun da l'ospital Tusaun, na vul betg perder la vischnanca Albula/Alvra. Avrir maletg en lightbox.

Legenda da maletgs: Roland Weber, il president dal cussegl da fundaziun da l'ospital Tusaun, na vul betg perder la vischnanca Albula/Alvra. RTR, Federico Belotti

L’ospital da Savognin perencunter na pretendia betg ina tala garanzia da deficit, plitost saja l’ospital sfurzà da lavurar uschia, ch’i na dettia nagin deficit.Tenor il messadi na duai dar per ils pazients naginas restricziuns cun la midada da la regiun d’ospitals, cunquai ch’i valia en Svizra la libra tscherna dal medi e da l’ospital.

L'ospital da Savognin n'ha betg prendì posiziun en chaussa. Ils 12 da december decida la radunanza communala Albula/Alvra, a tge regiun d'ospitals ch'ella vul sa participar en avegnir, e fa ina proposta a la regenza Grischuna.

RR actualitad 07:00