Plinavant ha la radunanza communala approvà la lescha da l'ovra electrica da la vischnanca Bravuogn Filisur, ed era la lescha da pajas dals commembers da las autoritads è vegnida approvada.
Ovra ha dapli che 100 onns
L'ovra idraulica da Preda ch'è vegnida construida l’onn 1898 saja en in stan manglus, ha la vischnanca Bravuogn Filisur infurmà a la radunanza communala da mesemna saira. Uschia manchia tranter auter tocca da reserva per las maschinas, las veglias lingias da pressiun sajan en in nausch stadi, e la tschiffada d'aua al lai da Palpuogna na funcziunia betg pli endretg.
Ovra idraulica vegn sanada
Grazia ad il credit che la radunanza communala ha approvà, po l'ovra idraulica vegnir sanada. Dal program «indemnisaziun per cuvrir ils custs da la furniziun d'electricitad KEV» ha la vischnanca gia l'atun 2014 survegnì il consentiment. La vischnanca po quintar cun 19,3 raps per ura kilowatt producida. Suenter la renovaziun duai la producziun d'energia s'augmentar per 26% sin passa quatter milliuns uras kilowatt.
La vischnanca da Bravuogn Filisur quinta da pudair manar l'ovra idraulica cun gudogn, grazia ad ils daners dal KEV. Quels daners èn garantids per ils proxims 20 onns. La vischnanca quinta cun entradas annualas da 715’000 francs e cunquai d'avair amortisà las investiziuns en l'ovra idraulica entaifer 12 onns.
Lescha vegn adattada
Cunquai che Bravuogn e Filisur fusiuneschan sin l'entschatta da l'auter onn sto era vegnir adattada la lescha da l'ovra electrica. Grazia ad il consentiment da la radunanza communala da mesemna saira po quella lescha ir en vigur sin l'entschatta da l'onn 2018.
L'ovra electrica è en possess da la vischnanca Bravuogn Filisur e stat sut la gestiun strategica e sut la surveglianza da la suprastanza communala. En la cumissiun d'electricitad fan part trais persunas. Quai èn il president communal Luzi Schutz e Stephan Mettier e Reto Bachmann.
Lescha da pajas è sut tetg
Plinavant è ussa enconuschent quant ch'ils represchentants da la vischnanca gudognan. Il president communal da Bravuogn Filisur vegn indemnisà cun 48'000 francs ad onn, il vicepresident gudogna 13'200 francs ed ils commembers da la suprastanza 10'800 francs.
RR actualitad 08:00