Ina part constanta da l’aua da l’Ava da Savriez vegn a cular da nov sur la cuntrada da Son Roc, nua che l’aual va en l’Ava dallas Tigias. Il rest va sur ina lingia en in’auter aual. Sper renovar la tschiffada da Savriez e bajegiar ina nova lingia, vegn er construì in nov aual sin la cuntrada da Son Roc. Las lavurs da revitalisaziun duessan finir anc l’october, di Thomas Ziegler, il manader da project da las Ovras electricas da Turitg (EWZ). L’entir project custa 900’000 francs e vegn finanzià cumplettamain da l'EWZ.
Lescha federala pretenda mesiras
Las lavurs da revitalisaziun stattan en connex cun l’artitgel 80 da la lescha dad auas. Quella pretenda da sanar auas restantas per ovras idraulicas. Las mesiras èn vegnidas decididas ad ina maisa radunda cun partenaris da l'EWZ, dal chantun, da l’uniun da pestgaders, organisaziuns da l’ambient sco er da las vischnancas concessiunarias.
Divers project èn gia vegnids realisads
Las lavurs sin l’Alp Flex n'èn betg las sulettas che vegnan realisadas. Sin la planira da Rona èn gia diversas lavurs da revitalisaziun vegnidas fatgas, tar la tschiffada d’aua Faller èsi gia vegnì realisà l'onn 2016 mesiras. Dapi l'onn 2019 dat il lai da fermada da Marmorera puspè aua restanta a la Gelgia. Ed en Bregagia ed a Turitg èn diversas mesiras gia pli ditg vegnidas realisadas.