Las radund 1'200 abunentas ed abunents da la Pagina da Surmeir han quests dis survegnì ina brev cun ina retschertga. Quella duess sclerir enfin la fin da quest mais, co ch’ils texts dal Surmeir duessan cumparair en l’avegnir. L’emprima varianta è da laschar tut sco enfin ussa, vul dir ina gasetta emnila cumplettamain en rumantsch.
La segunda proposta è, d’integrar ils texts rumantschs en la gasetta tudestga Novitats, che cumpara en la regiun Lai-Valbella, Vaz, Filisur, Bravuogn ed Alvra. Uschia ch’i duess dar ina gasetta bilingua rumantsch e tudestg. Sco che l’Uniun Rumantscha da Surmeir scriva, pudess il rumantsch gudagnar uschia simpatia tar ils giasts ch’hajan interess vi dal pled rumantsch. Examinaziuns cun la Somedia ch’edescha las Novitats hajan mussà, ch’ils custs d’abunament na sa midassan betg.
Naginas consequenzas per la redacziun
Betg pertutgada da las midadas è la redacziun: La Fundaziun Medias Rumantschas FMR procura per ils artitgels schurnalistics, e l’Uniun Rumantscha da Surmeir URS è responsabla per la stampa e la spediziun da la gasetta. Plinavant maina la URS era anc l’administraziun dals abunents e dals inserats. Independent dal resultat da l’enquista actuala: Ils texts dal Surmeir vegnan era en l’avegnir a cumparair sco enfin qua en la gasetta La Quotidiana.
