Pagina da Surmeir ponderescha collavuraziuns

La gasetta emnila «La Pagina da Surmeir» stat davant in avegnir intschert. En radund trais onns va il schefredactur en pensiun, e las turbulenzas enturn «La Quotidiana» chaschunan per gronda inquietezza. Ina collavuraziun cun ina gasetta en tudestg è ina soluziun pussaivla per l’avegnir.

La pli nova ediziun da la Pagina da Surmeir. Bild in Lightbox öffnen.

Legenda da maletgs: La pli nova ediziun da La Pagina da Surmeir. mad

L'onn passà ha «La Pagina da Surmeir» gì a disposiziun in budget da radund 340’000 francs. Per l’ina vegn la gasetta surmirana finanziada entras inserats e dals radund 1’200 abunents, per l’autra datti daners dal maun public. Ina cumpart impurtanta èn ils radund 100’000 francs ad onn che «La Pagina da Surmeir» survegn da l’Agentura da novitads Rumantscha ANR sco contribuziun per la promoziun da la pressa rumantscha. Sco cuntraprestaziun sto «La Pagina da Surmeir» trametter mintga di in artitgel a la ANR. Senza ils daners da l'ANR fissi impussibel per «La Pagina da Surmeir» da surviver en la furma actuala.

Contract sto vegnir prolungà

Il contract tranter l'ANR e «La Pagina da Surmeir» vala gia dapi l’onn 2000, el è adina puspè vegnì prolungà automaticamain. Il contract actual vala anc enfin la fin da l’onn 2018. Sch’il contract vegn puspè renovà, è per il mument intschert. La raschun è che l’ANR sto s’organisar da nov ils proxims onns ed il medem mument lavura la Lia Rumantscha vi d’in nov concept per las medias rumantschas. Sco quai che Martin Gabriel, il president da l’Agentura da novitads rumantscha ha ditg, na saja il mument betg anc segir, sch’il contract cun l’Uniun rumantscha da Surmeir possia vegnir prolungà a partir da l’onn 2019.

Paginas rumantschas en gasetta tudestga?

Tar l’editura da «La Pagina da Surmeir», l’Uniun rumantscha da Surmeir ponderesch'ins ussa, sco che l’avegnir da la pressa surmirana pudess vesair ora. Gian Sonder, il president da l’uniun ha ditg, ch’ina pussaivladad fiss ina collavuraziun cun las gasettas «Pöschtli», «Novitads» u la gasetta turistica da Savognin. Decis n'hajan ins però anc nagut. Ina gasetta bilingua empè d’ina gasetta quotidiana per l’entir intschess rumantsch vegnia favurisada, perquai ch’il privel saja grond da vegnir memia fitg sut las rodas en ina gasetta rumantscha surregiunala, ha ditg Gian Sonder.

Las finanzas da la PDS (quint 2016)

Las entradas da la Pagina da Surmeir: Las cifras pertutgan il quint 2016 ch'era equilibrà tar entradas totalas da CHF 339'003.

Las expensas da la Pagina da Surmeir: Las cifras pertutgan il quint 2016 ch'era equilibrà tar expensas totalas da CHF 338'983.

RR actualitad 12:00