Sco quai ch’il president communal da Valragn ha ditg envers RTR, fissi impurtant che la plazza da tir fiss integrada en il Parc Adula: «La valur da la plazza da tir è gronda, cun quai ch’ina gronda part da l’areal da tir n’è betg accessibla al public, avain nus qua ina gronda biodiversitad», ha ditg Georg Trepp.
VBS na vul betg «esser parc»
Il Departament federal da defensiun, protecziun da la populaziun e sport VBS na vul però betg che la plazza da tir vegnia integrada en il parc. Tenor il pledader dal VBS Renato Kalbermatten na sajan las pretensiuns d’in parc betg ademplidas, cunquai che las reglas per in parc naziunal pretendian da porscher protecziun, recreaziun e furmaziun: «Paucs vegnan ad avair plaschair en il parc, sch’i avessan da vesair schuldads e chars armads en il parc», uschia il pledader dal VBS.
Suveran da Valragn decida
Questa saira vul la vischnanca da Valragn decider, co ch’i duai ir enavant cun la dumonda da la plazza da tir. «Suenter che las discussiuns cun il VBS han fatg naufragi, vesain nus sulettamain l’opziun da desister da l’idea d’integrar la plazza da tir en il Parc Adula», uschia il president communal da Valragn Georg Trepp.