Siglir tar il cuntegn

Grischun Central Parc Beverin daventa pli grond

Suenter che las vischnancas da Spleia, Nufenen e Valragn han decidì da vulair sa participar al parc natiral, ha ussa era la radunanza generala dal Parc ditg cleramain gea a l'engrondiment. Quai scriva il Parc Natiral Beverin en ina communicaziun.

Legende: Audio Bunura: Parc Beverin daventa pli grond abspielen. Laufzeit 03:17 Minuten.
03:17 min, Actualitad dals 28.04.2018.

En il decurs da quest onn sto il Parc Beverin planisar la finanziaziun, las finamiras e las prestaziuns per la nova perioda da program dal parc che cuzza dal 2020 enfin l’onn 2023. L’auter onn lura vegn decidì definitiv sch’il parc po daventar pli grond.

Sco quai ch’il directur dal parc Remo Kellenberger ha ditg envers RTR, saja previs ch’era il stan da sajettar da Valragn fetschia part al parc. Da l’uffizi da defensiun haja quai gia dà il consentiment.

Remo Kellenberger, il directur dal Parc Natiral Beverin.
Legenda: Remo Kellenberger, il directur dal Parc Natiral Beverin. RTR, Federico Belotti

Pir avant in onn e mez avevan Spleia (gea), Valragn (gea) e Nufenen (na) votà davart la participaziun al Parc Adula. Cun quai che quel ha fatg naufragi, datti ussa il project da sa participar al Parc natiral Beverin. Il parc Beverin è gia vegnì engrondì ina giada, cura che Versomi e Valendau èn daventads part dal parc l’onn 2015.

Dasperas las vischnancas numnadas èn era las suandantas vischnancas part dal parc: Sufers, Andeer, Ferrera, Donat, Ziràn-Reschen, Lon, Maton, Casti-Vargistagn, Rongellen, Tschappina e Stussavgia.

RR actualitad 11:00