Siglir tar il cuntegn

Grischun Central Parc Ela ha elegì il meglier crimi

Andreas Ulich da la Germania gudogna la concurrenza da scriver in crimi davart ils morts da Falein. Il victur e set auters nominads èn vegnids onurads a Bravuogn a chaschun dal «Bergfahrt Festival».

Andreas Ulich ha gudagnà la concurrenza cun sia istorgia che porta il titel «Kranewitt».
Legenda: Andreas Ulich ha gudagnà la concurrenza cun sia istorgia che porta il titel «Kranewitt». Parc Ela

Sco basa per la concurrenza da crimi vala il chat misterius dad ossa l’atun 2014 a Falein sur Filisur. Là èn vegnids chattadas duas chavazzas umanas e divers oss ch’han ina vegliadetgna da 1200 onns. Las blessuras vi da las chavazzas lain supponer in act da violenza. L'uniun Parc Ela ed il servetsch archeologic dal Grischun han perquai gì l'idea da laschar scriver in'istorgia, in crimi en quest connex.

Ils nominads

Las 8 meglras istorgias èn vegnidas da Stephan Peter Johannes Cramer da Minca (D), Manfred Haag da Pfäfers (CH), Thomas Kurze da Frankfurt (D), Noëmi Sacher Stojanov da Arth (CH), Clara-Sophie Schwarz da Zehnhausen (D), Thomas Stumpf da Rodalben (D), il victur da la concurrenza Andreas Ulich, Bamberg (D), e cun in’istorgia rumantscha Paula Casutt da Falera (CH). En tut èn vegnidas inoltradas 177 istorgias enfin la fin da l'onn 2015, e quai, or da 7 pajais.

Exposiziun a Bravuogn

Ils victurs èn vegnids preschentads la sonda al «Bergfahrt Festival» a Bravuogn. A la surdada dals premis ha l’actura Grischuna Felicitas Heyerick prelegì l’istorgia ch’ha gudagnà la concurrenza. Il medem temp ha il servetsch archeologic exponì ils chats da skelets. Ils megliers otg crimis èn vegnids registrads sco cudesch auditiv., il link avra en ina nova fanestra