Las vischnancas paran dad esser fitg cuntentas cun la lavur prestada enfin uss dal Parc Natiral Beverin. Roman Schamaun, il president communal da Ziràn resumescha: «Il Parc fa buna lavur e nus n'havain nagut da reclamar». La directura Ramona Liebeton visita il mument cun diversas collavuraturas e collavuraturs las radunanzas communalas per entrar en discurs cun la populaziun. «Ina communicaziun averta è la basa per sa sviluppar» di Liebeton.
La visiun dal parc saja tranter auter da promover il spiert da piunier cun lantschar ideas innovativas per la regiun e quai cun integrar fitg la populaziun.
Il luf ed il parc
Ina gronda dumonda è en il mument il luf. Il triep dal Beverin chaschuna inquietezza e dumondas tar la populaziun. Tenor Ramona Liebeton ha il parc la funcziun neutrala, «ina funcziun dad intermediar», pertge las responsabladas sajan cleras ed il parc na fetschia nagina politica.