Il Parc natiral Beverin survegn in nov mainafatschenta. La suprastanza dal parc ha elegì Simon Egger sco nov directur. L'inschignier agronom succeda cunquai a Ramona Liebeton ch'ha timunà il parc ils ultims trais onns. Sco l'uniun dal parc communitgescha cumenza Egger ses nov post sin l'emprim da matg.
Ils ultims onns è el stà il manader da la secziun cuntrada ed aua persa dal chantun Argovia. Avant ha el plirs onns lavurà tar l'Institut da perscrutaziun Agroscope ACW a Wädenswil. Tranter auter ha el manà ina gruppa da perscrutaziun.
Midada en la suprastanza da l'uniun
A chaschun da la radunanza dals commembers vegni era a dar ina midada en la suprastanza da l'uniun Parc natiral Beverin. Thomas Buchli ch'è president dapi il 2018, ha decis da dar giu quest timun. El veglia sa concentrar sin sia famiglia e sin ses manaschi agricul. Sco successur sa metta Daniel Camenisch a disposiziun ch'è il mument vicepresident.
