Siglir tar il cuntegn
Vista vers il portal nord da tunnel da San Bernardino
Legenda: A dretga dal portal nord dal tunnel dal San Bernardino eran planisads ina giada in tancadi ed in pausadi cun motel. RTR, Federico Belotti

Grischun Central Pausadi al San Bernardino resta be in siemi

In pausadi, in tancadi ed in motel, eran planisads a Valragn. I para ch'i restia mo tar ils plans. Ils iniziants, la firma M&G Contract SA da Mendrisio, n'èn en mintga cas betg s'annunziads pli tar la vischnanca. Il dretg da construcziun è scadì il november passà.

Il 2011 èn vegnids preschentads plans per in pausadi cun motel e tancadi curt avant l'entrada dal tunnel da San Bernardino. La vischnanca da Valragn e la regenza grischuna han acceptà la midada d'intent da la zona. Ed il 2012 è lura schizunt vegnida inoltrada ina dumonda da construcziun - concrets èn ils plans dentant mai vegnids.

La firma M&G Contract SA posseda bain anc la parcella da 2'630 meters quadrat - ils responsabels n'èn dentant betg cuntanschibels e la vischnanca na sa er betg dapli. Il permiss da construcziun è scrudà il november 2017, ina nova dumonda n'è betg vengida inoltrada. Il project «Grossmatta» quintava ina giada cun investiziuns da 20 milliuns francs. Ussa è quest project gia bunamain emblidà e prest mess ad acta.

RR actualitad 11:00

Artitgels legids il pli savens