Cura che la pendiculara da Tigignas a Somtgant è vegnida bajegiada avant sis onns avevan las Pendicularas da Savognin anc mess en vista da prolungar la pendiculara existenta e colliar quella cun la nova e far ina staziun d’amez da Tigignas.
La staziun sisum da la nova pendiculara da Savognin a Tigignas duai vegnir construida gists dasperas la staziun da la pendiculara existenta vis a vis, e betg pli sin il mut pli ensi. Uschia èsi pli simpel da far midada, e peduns èn pli spert en l’ustaria e na ston betg pli ir sur la stgala u nizzegiar la pitschna cabina da funiculara che maina ils peduns davant l’ustaria.
Pertge betg colliar la veglia cun la nova?
Sco quai che Christian Prinz, il directur da las pendicularas da Savognin ha ditg envers RTR, custia la nova pendiculara circa diesch milliuns francs. Sch’ins vuless colliar quella cun la pendiculara existenta alura custassi radund trais fin quatter milliuns dapli. La raschun saja ch’i duvrass in sutpassadi ed in indriz che lascha sa distatgar las duas pendicularas, en il cas che per exempel la pendiculara sisum avess da vegnir messa giu pervi da memia bler vent. In’autra problematica vesa il directur en il fatg che las pendicularas fissan savens occupadas ed i daventass grev dad entras en la telecabina cun quai che quellas fissan savens occupadas a Tigignas.
Sustegn da la vischnanca
Ils 29 da matg decida la radunanza communala da Surses, sch’ella vul sa participar cun in emprest senza tschains da dus milliuns francs vi da las Pendicularas Savognin SA.
Contribuziuns da l'onn 2012
RR actualitad 07:00
