Investir en energia solara
Sco quai che Markus Schröcksnadel, il president dal cussegl d’administraziun da las Pendicularas da Savognin ha ditg envers RTR, veglian las pendicularas investir en l’avegnir en implants da fotovoltaica. Il mument vegnian evaluadas las pussaivladads. Cun quai che la pendiculara dovria surtut durant il di blera energia, saja la speranza da pudair nizzegiar ina gronda part da l’energia sezza. Ins pondereschia plinavant, da pudair arcunar l’energia solara grazia l’electrolisa. Energia solara che vegnia producida memia bler durant la stad, pudessi uschia vegnir duvrada l’enviern.
Transportà dus milliuns skiunzas e viandants
Las pendicularas da Savognin han transportà il davos onn dus milliuns giasts. Quai èn bunamain 20% dapli che anc l'onn avant. In sumegliant augment po la Savognin Pendicularas SA er annunziar tar la svieuta, sco la FMR scriva. Quella è creschida per 22% sin 9,2 milliuns francs durant l'onn da fatschenta 2021-2022. A la fin dals quints serran las pendicularas Savognin suenter amortisaziuns da 2,9 milliuns francs quest onn cun in resultat equilibrà – il gudogn munta a 3'340 francs.
Investì en l'ennavaziun
Las cifras positivas na sajan betg be il merit da da las relaziuns da naiv excellentas, mabain er l'effect da las investiziuns fatgas ils davos 10 onns. Quellas muntan a radund 40 milliuns francs. Investì è vegnì oravant tut en ils indrizs da far naiv e cun remplazzar duas sutgeras tras telecabinas. L'onn da gestiun actual han las pendicularas Savognin danovamain investì 1,2 milliuns francs per modernisar ed automatisar ils indrizs d'ennavaziun, quai en il territori da las Martegnas e da la pista da FIS Fugna.
Nov um en il cussegl d'administraziun
A la radunanza generala la sonda saira è il cussegl d’administraziun actual vegnì confermà. Da nov en suprastanza è Ivar Jeker. El è il figl da Leo Jeker che banduna il cussegl d’administraziun.
