Siglir tar il cuntegn

Header

cuntegn

Pendicularas Tschiertschen Visiun: colliaziun cun Arosa

Dapi onns sbattan las pendicularas per il surviver. Che las pendicularas èn per il vitg da muntada existenziala èn ils responsabels da las pendicularas segirs. A lunga vista duai perquai ina colliaziun cun Arosa salvar il manaschi da las pendicularas.

Dapi onns sbattan las pendicularas da Tschiertschen per il surviver. Il davos onn èn schizunt donaziuns da 350'000 francs stadas necessarias per evitar cifras cotschnas. Il futur na vegni betg meglier. Il territori da skis na posseda betg in endretg indriz da producir naiv artifiziala, uschia ch'igl è a lunga vista betg pussaivel da garantir il manaschi. Tenor ils responsabels haja il territori da skis per Tschiertschen dentant ina immensa impurtanza:

Per il vitg da Tschiertschen ha il territori da skis ina muntada existenziala.
Autur: Hardi Engiresponsabel per manaschi da las pendicularas Tschiertschen

A lunga vista: Colliar territoris

A lunga vista saja ina colliaziun cun Arosa tras ina pendiculara l'unica opziun da garantir il servetsch da las pendicularas Tschiertschen, manegian ils responsabels da las pendicularas. Il mument vegni fatg in studi davart la realisabilitad. Ils abitants e giasts da Tschiertschen han questa stad gì la pussaivladad da parter lur opiniun tar quai project, quai en il rom d'ina retschertga. Lura è il resun stà positivs.

A curta vista mancan ils daners

A curta vista dovran las pendicularas dentant era daners. Perquai è l'idea da realisar ina varianta «service public», vul dir che giasts ed indigens pajan ina tscherta summa annuala a las pendicularas (tranter 1'000 e 2'000 francs).

A curta vista è quella schliaziun buna. Ma ella na schlia betg il problem cun la naiv.
Autur: Hardi Engiresponsabel per manaschi da las pendicularas Tschiertschen

Il grond problem resta: Per Tschiertschen n'èsi betg pussaivel da far naiv artifiziala cunquai ch'in indriz na vegn per motivs da custs betg en dumonda. Uschia dovria, er gist pervi da la midada dal clima, ina colliaziun cun in auter territori da ski.

Pli blera reclama, pli gronda purschida?

Ils giasts fissan per gronda part d'accord cun ina colliaziun, schegea che la fascinaziun dal pitschen territori en il zuppà giess uschia in zichel a perder. Els han dentant era anc gì autras ideas, co ins savess purtar nov schlantsch:

Ins pudess bain anc far dapli reclama. En la Bassa enconuschan fitg paucs il lieu ed il territori.
Autur: Dunna da Turitg
Tenor mai stuessan ins sur l'entir or mirar tge ch'ins pudess porscher: Turas da viagiar, rutas da mountainbike etc.
Autur: Dunna da Hamburg

Dapli reclama Gea, engrondir purschida Na

Las propostas dals giasts plaschan mo per part al responsabel per il manaschi da las pendicularas a Tschiertschen, Hardi Engi. Il futur veglian ins bain far dapli reclama, cunzunt dapli reclama digitala. D'engrondir la purschida durant l'entir onn n'è per Hardi dentant nagin'opziun. Cunzunt en il sectur da mountainbike saja la concurrenza a Lai bler memia gronda. Ina purschida da stad cun sendas da viagiar saja fitg grev da realisar a moda rentabla. Hardi vesa sulet ina schliaziun: Colliar il pitschen territori da skis da Tschiertschen cun il grond da Arosa. Sche quai è ina opziun, vegn il mument evaluà cun in studi da realisabladad.

RTR actualitad 12:00

Artitgels legids il pli savens

Ir a sanester Ir a dretg