Il consentiment da la radunanza communala è be l'emprim pass: Ils 29 da mars sto la cumpra anc vegnir confermada en ina votaziun a l'urna. Sche quai faschess naufragi, smanatscha il concurs da la proprietaria, quai che pudess chaschunar in ingiant da l'immobiglia nuncontrollabel . La vischnanca vesa en quest reguard in ristg, perquai ch'il futur da l'hotel e ses diever fissan en cas d'in ingiant intscherts.
Ils motivs en survista
- evitar concurs sin entschatta avrigl
- chattà nagins cumpraders
- suenter concurs n'avess la vischnanca nagina pussaivladad da far part a l'ingiant
- segirar infrastructura turistica en la regiun
Agir avant ch'ins na po betg pli prender sez per mauns il svilup
La vischnanca è sfurzada da daventar sezza activa, perquai che nagin n'ha mussà interess vi da l'immobiglia, malgrà las stentas dapi l'avust 2022. Il motiv per quai è la pitschna rentabilitad da l'hotel che na para betg lucrativ per interpresas privatas. Per la vischnanca stat dentant il niz per la regiun a lunga vista en il center, en spezial la garanzia da l'infrastructura turistica.
Sch'i dess dentant in Na a la votaziun a l'urna la fin mars, stuess la vischnanca sa retrair dal project, quai che muntass la fin dals plans per reactivar l'hotel.
La decisiun davart l'acquist da l'hotel vegn valitada dad observaturs sco necessaria e raschunaivla. Il pretsch da cumpra da 5 milliuns francs vegn valità sco giustifitgà en cumparegliaziun cun ils 19 milliuns investids en l'hotel avant 20 onns. Cun l'uniun Albierts da giuventetgna svizzers sco partenaria vesa la vischnanca a lunga vista ina perspectiva per il manaschi da l'hotel. Quest hotel pudess cun ses passa 280 letgs giugar ina rolla impurtanta per il turissem en la regiun.