La EWZ ha planisà en il rom dal «Solarexpress» in implant solar autalpin en la vischnanca dal Valragn. Quel avess pudì producir annualmain fin a 12 uras gigawatt electricitad solara per bunamain 5'000 chasadas. Dentant sajan plirs acturs ed investurs en il turissem s'exprimì cunter quest project.
«Betg cumpatibel cun ils projects turistics»
Sco Christian Simmen, il president da la vischnanca da Valragn, vegn cità en la communicaziun, na saja in implant solar en questa dimensiun betg stà cumpatibel cun ils plans turistics en il futur. Dentant saja la vischnanca averta dad examinar ensemen cun la EWZ auters projects pussaivels en la vischnanca.
EWZ deplorescha questa decisiun
Sco la EZW scriva, saja quest lieu en il ressort da skis Spleia-Tambo ideal per in implant solar e deplorescha questa decisiun. Per cuvrir la dumonda creschenta d'electricitad, fiss in implant solar necessari. Malgrà questa decisiun cunter Tambo-Solar e cunter il project Nandro-Solar ch'è vegnì refusà dal suveran il davos da schaner, è EWZ vinavant persvadì dals avantatgs dad implants solars autalpins. Uschia vegn la EWZ ad examinar ensemen cun la vischnanca da Valragn ulteriurs pussaivels projects.
