Siglir tar il cuntegn

Grischun Central Peschs e plazzas van en il Mesauc, betg ad Alvaschagn

La Swiss Alpine Fish SA vul bajegiar ina tratga da salmuns a Lostallo en il Mesauc. La dumonda da bajegiar saja vegnida inoltrada, quai ha confermà il pledader da la firma turitgaisa. Betg pli persequità vegn il project ad Alvaschagn, ch’era era medemamain in’opziun.

Vista da surengiu sin la vischnanca d'Alvaschagn.
Legenda: Alvaschagn na survegn nagina tratga da salmuns. RTR, F. Belotti

Sco proxim decida la radunanza communala da Lostallo ils 12 da favrer davart ina midada da zona. Vegn quella approvada, sto la regenza decider davart il project che prevesa la construcziun da 2 bajetgs per l’allevament da salmuns. Quant ditg ch’il proceder dura, n’ha l’Uffizi per il svilup dal territori betg pudì dir.

Albula/Alvra deplorescha decisiun

La vischnanca Alvra deplorescha la decisiun da la Swiss Alpine Fish SA. Sco quai ch’il suprastant Giatgen Augustin ha ditg, haja el gì gronda speranza da pudair stgaffir tranter 15 e 20 plazzas da lavur ad Alvaschagn. Ins haja dentant betg fatg la lavur per nagut: Ussa saja la zona pronta era per auters affars sco per exempel ina scrinaria u ina garascha che veglia fitgar pe en la zona d’industria.