A Veulden vegnan las persunas e famiglias che tschertgan quietezza durant las vacanzas. Nagin ramba zamba, persuenter blera natira, bler sulegl ed il scharm dal famigliar. Sin la glista da giavischs per las vacanzas da sport è segiramain era la naiv.
Buna entschatta da la stagiun 2023/2024
Tranter 1'000 e 2'000 persunas hajan duvrà mintga di la sutgera a Veulden durant ils dis da festa, ha il mainafatschenta Roman Bernard fatg bilantscha l'entschatta 2024. Quai èn bun 70% dapli che l'onn passà – il meglier enviern en l'istorgia da passa 60 onns da las pendicularas da Veulden.
Ed era sin l'alp Raguta, nua ch'ina uniun maina in'ustaria ed ina patinera natirala, èn las fatschentas idas bain. Ma actualmain è il glatsch serrà – i saja stà memia chaud, tradescha Evi Attinger, la presidenta da l'uniun. Ma l'ustaria è averta ed ins possia viagiar e scarsolar. Ed er il panorama fantastic saja gia motiv avunda per ina visita.
Sperar sin nova naiv
Naiv dovri bunamain per in territori da skis e scarsolar. La situaziun actuala en vista a las vacanzas da sport è dentant tut in'autra. Ins spetga ferventamain sin naiv e surtut sin temperaturas pli bassas. Las pistas vegnan schanegiadas e per part èn ellas er serradas, sco ch'il bulletin online tradescha.
Da Sched a Savognin
Luana Tscharner è creschida si gist sper Veulden – a Sched. Las emprimas experientschas sin skis ha ella fatga sco uffant sin las pistas da Veulden. Dentant ha ella midà regiun ed è ussa dapi passa tschintg onns responsabla da marketing l'enviern per las pendicularas da Savognin. Per la spezialista da turissem è l'enviern sco enfin ussa stà in da sis en il lotto. Dis avant Nadal cun naiv, ina cuntrada alva e bunas cundiziuns da pista – quai saja adina ina buna reclama, er per promover schon ussa la proxima stagiun d'enviern.
