Serrà vegnia in traject sin 2'100 meters sur mar en il conturn tranter il lieu «Chräjachöpf» fin tar il lieu «Lügga» al cunfin cun la Val Schons. La senda «Heidbüel» restia vinavant averta, ha ditg Simon Gartmann. La vischnanca vegnia ad observar ils proxims dis – e sch’i na dettia nagina crudada da crappa alura vegnia la senda da viandar puspè averta.
Sensibilisà sin il tema
Ch'i dat crudadas da crappa al Piz Beverin n'è nagut da nov – surtut cura ch'i plova pli ferm. L'ultim temp hai dentant dà intginas lingias grassas pervia crudada da crappa en autras regiuns dal chantun. Cun quai sajan ins in pau pli precaut, di Gartmann. Plinavant sajan actualmain blers turists da viadi. Qua na veglian ins betg ir en in pli aut ristg, manegia il president communal.
Cler saja dentant er: Il Piz Beverin è adina en moviment. Ed ins vegnia vinavant a tegnair en egl la situaziun. Plinavant saja il traject fin sin il Piz Beverin per part marcà cun colur blau-alva. Quellas persunas ch'èn là da viadi fetschian quai sin agen ristg, uschia Simon Gartmann.
Naginas restricziuns datti tar l’access da la Val Schons sin il Piz Beverin. Il president communal da la Muntogna da Schons ha confermà, ch'i na dettia actualmain naginas restricziuns tar l’access sin il Piz Beverin da vart da la Val Schons.
Novitads, eveniments ed istorgias localas. Tut tge che curra e passa en il Grischun Central chattais vus qua.