La chasa da vacanzas per gruppas Sanaspans a Lai duai vegnir vendida. La radunanza communala da Zollikon, che posseda l’immobiglia, ha decidì da vender ella per set milliuns francs. La raschun è ch’i stuessan vegnir investids dapli che trais milliuns francs en la renovaziun e perquai che la chasa na vegnia betg pli duvrada da la scola per camps.
Cumprar l’immobiglia cun 14'000 meters quadrat terren vul la la firma Domenig Immobiglias. La pretaisa dentant che l’entir terren po vegnir midà en ina zona d'hotel.
La vischnanca da Vaz vul uss instradar ils proxims pass. Quai ha ditg il president communal Maurin Malär sin dumonda da RTR. Cura ch’ina midada da zona pudess ir en votaziun, na saja per il mument betg anc cler. La Domenig Immobiglias da Cuira vul fabritgar a Lai in nov hotel. Il mument vegn fatg in studi da realisabladad.
