Siglir tar il cuntegn

Header

cuntegn

Grischun Central Plant pervi dal project Barnagn a Savognin

En connex cun il project da hotel Barnagn ed abitaziuns da vacanzas Viols a Savognin hai dà in plant. Fatg quel ha Rudolf Tucek, sco el scriva sez en ina communicaziun a las medias. Las renfatschas èn massivas.

Rudolf Tucek pretenda ch’i saja tranter auter vegnì cugliunà, fatg maldiever da l’uffizi, administrà nun-correct, empruvà da metter sut squitsch e cuntrafatg al dretg d’autur. Il plant sa drizza cunter duas firmas d’immobiglias, il possessur da quellas e cunter l’anteriur president communal.

Sco Rudolf Tucek scriva, haja el fatg quest plant gia ils 13 da schaner 2017. La procura publica haja prendì encunter il plant e saja vida far inquisiziuns.

audio
Mezdi: Savognin - Rudolf Tucek fa plant en connex cun il project Barnagn
ord Actualitad dals 07.04.2017.
laschar ir. Durada: 3 minutas 11 Secundas.

Gronda surpraisa

Sco quai che l’anteriur president communal da Savognin ha ditg envers RTR, saja el prest crudà giu da la sutga, cura ch’el haja sentì dal plant cunter sia persuna. Vegnì da savair dal plant saja el sur in email dal president communal da Surses. El haja tramess enavant ad el in email, che Rudolf Tucek ha derasà sur las medias. Era il maina fatschenta da la Mufag Immobiglias SA è stà fitg surstà davart il plant, era el è vegnì da savair sur las medias davart il plant. Tenor la procura publica dal Grischun saja quai in agir normal, betg adina vegnian las persunas involvidas en las emprimas examinaziuns da la polizia e da la procura publica, ha confermà Maurus Eckert, il pledader da la Procura publica grischuna.

Co enavant?

Quant ditg che las examinaziuns da la polizia vegnan a cuzzar n’è betg cler per il mument. Il proxim pass vegn ad esser, che la procura publica vegn a decider, sch’i vegn avert ina inquisiziun penala u betg. Sch’i vegn a sa mussar che las reproschas da Rudolf Tucek èn pauc plausiblas, alura vegn il cas mess ad acta, cun ina uschenumnada «Nichtanhandnahmeverfügung».

Project mess ad acta

L’october passà aveva la vischnanca mess ad acta ils projects Barnagn e Viols cunquai ch’i n’era betg reussì da sa cunvegnir cun ils investiders. Rudolf Tucek - che maina il hotel Cube a Savognin - fiss stà responsabel per il manaschi da l'hotel, dal bogn e dal ressort da vacanzas planisà.

Il projet da 100 milliuns francs avess previs in ressort da vacanzas cun 96 abitaziuns, in hotel cun 200 letgs ed in bogn da divertiment public.

RR novitads 21.00

video
Neues Erlebnis-Bad Savognin
Or da Telesguard dals 03.06.2013.
laschar ir. Durada: 1 minuta 43 Secundas.

Artitgels legids il pli savens