Siglir tar il cuntegn

Header

cuntegn

Plazza da sport Lai Giavischs da populaziun vegnan evaluads

Il favrer 2019 ha il suveran da Vaz refusà il project, che vuleva modernisar la plazza da sport a Lai per radund 6 milliuns francs. Cun la finamira da ramassar ils giavischs da la populaziun ha la vischnanca lura fatg ina enquista tar la populaziun. Ils resultats da quella duain uss vegnir evaluads.

A la retschertga èn 678 persunas sa participadas e 70% da quellas han fatg part l'enquista han la dimora en vischnanca da Vaz. La quota da participaziun saja fitg legraivel, ha ditg Maurin Malär, il manader da la cumissiun dal cussegl communal che s'occupa cun l'avegnir da la plazza da sport.

Stad ed enviern

L'enquista haja tranter auter mussà ch'i dovria en l'avegnir ina plazza da sport moderna che po vegnir duvrada da stad ed enviern. Pliras giadas esi vegnì menziunà en la retschertga ch'ins stoppia reponderar il lieu actual da la plazza da ballape sut il café Aurora.

Suandants puncts èn vegnids menziunads il pli bler en l’enquista

  • Integraziun da la plazza da sport, la via Sport, pumptrack, plazza da tennis/Luziuswiese. Examinar, sch’in concept general per il lieu actual fa senn
  • lieu d’inscunter per giuven e vegl
  • plazza per moviment, recreaziun ed inscunters
  • vinavant ina plazza da ballape che correspunda als basegns da giugar en ina liga
  • magazin per uniuns che nizzegian la plazza da sport
  • reponderar lieu actual da la plazza da ballape
  • diever multifuncziunal da la plazza da sport actuala
  • plazzas da seser en il sulegl ch’èn protegidas dal vent
  • plazza per eveniments cun infrastructura
  • center da cursa lunga
  • plazza artifiziala per curling, hockey sin glatsch ed ir cun patins
  • indrizs sanitars ch’èn accessibels durant 24 uras
  • plazza d’inscunter per la scola da skis
  • Garascha sutterrana
  • bistro cun terrassa per star a sulegl
  • purschida indoor
  • access al traffic public

La finamira da la cumissiun plazza da sport è, dad examinar ils puncts numnads. Enfin la fin matg 2020 vul la cumissiun preschentar emprims resultats da l'evaluaziun da l'enquista. Pervi da quai vegn la cumissiun a discurrer cun tut las uniuns che profiteschan da la plazza da sport sco er cun experts da traffic, planisaziun e construcziun.

Ord l'archiv

Ils 10.02.2019 ha il suveran da Vaz refusà a l'urna il project che vuleva modernisar la plazza da sport per radund 6 milliuns francs. En la contribuziun dal Telesguard da la dumengia da votaziuns dat ina survista da las raschuns daco che quel project ha fatg naufragi a l'urna.

Video
Vaz na vul nagin nov center da sport a Lai
Or da Telesguard dals 10.02.2019.
laschar ir

RR novitads 06:00