Siglir tar il cuntegn

Grischun Central Plirs candidats per presidi Bravuogn Filisur

Tant da Bravuogn sco era da Filisur datti ina candidatura per il presidi da Bravuogn e Filisur, che fusiuneschan il proxim onn. Luzi C. Schutz e Stephan Mettier candideschan per l’elecziun dals 24 da settember, scriva il Bündner Tagblatt.

Il territori da la vischnanca fusiunada.
Legenda: Il territori da la vischnanca fusiunada. Grafica RTR
Stephan Mettier è il candidat da Bravuogn.
Legenda: Stephan Mettier. mad

Stephan Mettier è l’actual vicepresident communal da Bravuogn. El è electroinstallatur pensiunà cun atgna firma. El è stà en la suprastanza communala enfin l’onn 2006 e dapi il 2016 è el puspè preschent en il gremi. Pli baud ha el lavurà sco manader da gestiun tar las pendicularas Bravuogn-Darlux ed è stà president da la cumissiun d’electricitad, scriva il Bündner Tagblatt.

Returnar en la patria

Luzi C. Schutz.
Legenda: Luzi C. Schutz. Facebook

Luzi C. Schutz da Filisur ha dà enconuschent sia candidatura via social media. L’um da 29 onns ha studegià istorgia e scienzas politicas a l’universitad da Turitg. Ils davos dus onns ha el manà in project scientific da l’archiv statal da Turitg. Regularmain ha el era lavurà per il Bündner Tagblatt sco schurnalist. Suenter ch’el ha vivì otg onns a Turitg e perquai che ses engaschi en l’archiv statal saja a fin, veglia el metter ses center da vita puspè en val d’Alvra, scriva Schutz en in messadi davart sia candidatura.