Siglir tar il cuntegn
Inhalt

Grischun Central Possessur dal Cube en dispita cun vischnanca e pendicularas

Il coc da la dispita e pertge ch’il Cube è serrà, èn surtut las pendicularas da Savognin, di Rudolf Tucek il possessur da l'hotel Cube. Ellas pretendan 70'000 francs da Tucek, el pretenda d'avair scrit e tschertgà il discurs cun Markus Schröcksnadel il possessur da las pendicularas, ma adumbatten.

L'hotel Cube ch'è serrà, sa chatta gist dasper la sutgera da quatter a Savognin.
Legenda: L'hotel Cube ch'è serrà, sa chatta gist dasper la sutgera da quatter a Savognin. RTR, Federico Belotti

Ussa stat la pretensiun da Tucek envers las pendicularas che lezzas hajan incassà in mez milliun memia bler dad el envers la pretensiun dals 70’000 francs che las pendicularas vulan. Per minimar la sperdita haja el serrà il Cube, pretenda Rudolf Tucek: «Jau hai adina tschertgà il discurs, ma enfin oz senza success». Las pendicularas da Savognin na piglian il mument betg posiziun en chaussa.

Quints averts da 300'000 francs

Dasper questa dispita datti era ina dispita cun la vischnanca da Surses. La vischnanca discurra da 300’000 francs quints averts e Tucek conceda d’avair debits tar la vischnanca. «Entras represchentants da la vischnanca èn sa resultads gronds debits che n’eran betg necessaris, en connex cun il project da hotel al lai Barnagn ch’ha fatg naufragi», di Tucek. Da la vart da la vischnanca hai num che la vischnanca na saja betg responsabla per eventuals donns finanzials che sajan sa resultads per Tucek: «La vischnanca da Surses ha da l’entschatta davent communitgà che custs da planisar e projectar enturn il project al Lai Barnagn, van sin agen ristg». En quest connex na dettia nagut pli da discussiunar, ha ditg Leo Thomann, il president communal da Surses.

RR actualitad 08:00