Cun ina brev da sis paginas a la cussegliera federala Karin Keller Sutter, scheffa dal Department federal da giustia e polizia, crititgeschan praschuniers la direcziun da la praschun Tignez a Cazas. Crititgà vegn per exempel che la spassegiada è partida si en duas giadas ina mes'ura enstagl d'ina entira ura. In praschunier ha numnadamain il dretg sin minimum in'ura per di. Tenor la directura Ines Follador ch'ha prendì posiziun envers il schurnal regiunal da radio SRF, sajan quai tranter auter motivs d'organisaziun dal manaschi. I na saja pervia dal persunal da surveglianza betg pussaivel da laschar ir ina gruppa pli gronda sin ina spassegiada.
Adina puspè brevs da reclamaziun
Che praschuniers e praschunieras crititgeschan reglas, organisaziun e manaschi d'ina praschun saja adina puspe il cas, vegn confermà da Follador. «Humanrights.ch», l'organisaziun che s'engascha per ils dretgs umans è er infurmada ed en contact cun la direcziun da la praschun. La situaziun valitescha l'organisaziun sco almain problematica – mussaments per in cunterfar a leschas vertentas na dettia dentant betg.