Sco suletta scola sutsilvana ha la scola da Donat adina puspè da cumbatter per meds d’instrucziun actuals e moderns. Per il pli translateschan las scolastas ed ils scolasts gist sezs il material d’instrucziun, e quai è adina er cumbinà cun engaschament e lavur supplementara.
La scola da Donat è la suletta ch’instruescha il rumantsch sutsilvan. Enfin la 3. classa vegn instruì sulettamain sutsilvan, a partir da la 4. classa vegn il tudestg pli e pli impurtant, ed en la scola superiura dominescha lura il tudestg. Ils scolars Rumantschs han dentant vinavant lecziuns da rumantsch empè da talian e pon eleger il talian sco rom facultativ.
Fusiun da scolas en Val Schons
L’onn 2010 ha la scola da la Val Schons fatg in pass fitg impurtant, ha ditg il manader da la scola Philipp Hugentobler sin dumonda. La Val Schons ha numnadamain fusiunà sias scolas, uschia ch’ils uffants da l’entira val pon eleger suenter la scolina schebain els vulan ir a scola rumantscha u tudestga. Quai saja stà il salvament per la scola da Donat.
RR novitads 11:00