Siglir tar il cuntegn

Grischun Central Premiera dal film davart la vita da Segantini

Il reschissur Christian Labhart ha creà in film davart la vita da Giovanni Segantini. Il film viva surtut dals texts autobiografics da l'artist, ch’ha vivì plirs onns en il Grischun, da quels otg onns a Savognin. Legids vegnan ils texts da l’actur Bruno Ganz.

Legende: Video Premiera dal film davart la vita da Segantini abspielen. Laufzeit 03:38 Minuten.
Or da Telesguard dals 08.06.2015.

Christian Labhart n'ha sapientivamain betg laschà pigliar posiziun experts u critichers d’art en il film. En il center dal film stattan las picturas e las registraziuns da la natira e dals lieus nua che Segantini ha vivì: «Quai è fitg bel, ch'ins po ussa mussar las picturas da Segantini sin ina gronda tenda da kino», ha ditg il reschissur turitgais. Enfin oz na saja anc mai vegnì en ils kinos in film documentar da Segantini.

Premiera en il kino Quader

Il start da kino svizzer è ils 11 da zercladur, en il Grischun vegn il film mussà a Puntraschigna, a Tusaun, a Glion, a Claustra ed en la chapitala. En il kino Quader a Cuira ha lieu la premiera grischuna ils 10 da zercladur, quai en preschientscha dal reschissur e Beat Stutzer, istoricher d’art e curatur dal museum da Segantini a San Murezzan.

Il film cun il num «Giovanni Segantini - magia da la glisch» è vegnì realisà en collavuraziun cun RTR – RTR ha co-finanzià e mussa quest atun ina versiun Grischuna cun aspects Grischuns.