Siglir tar il cuntegn

Header

cuntegn

Grischun Central Preschentà plan d’evacuaziun bova da Brinzauls

Il vitg da Brinzauls ruschna pli e pli spert. Tenor ils geologs è era da quintar cun ina bova gronda en la dimensiun da 22 milliuns meters cubic material. Per quest scenari da «worst case» ha la vischnanca Alvra preschentà il venderdi in plan d’evacuaziun per Brinzauls, Vazerouls, Surava e Casti.

Radund 400 persunas han visità la saira d'infurmaziun a Casti.
Legenda: Radund 400 persunas han visità la saira d'infurmaziun a Casti. RTR, Federico Belotti

La schanza ch’ina bova da tala dimensiun ruschna a val è existenta: «Cun gronda probabilitad pudain nus dir ch’en las proximas emnas fin mais n’èsi betg da quintar cun ina gronda bova, ma sch’ils moviments en il grip s’avanzan sco enfin ussa, lura na pudain nus betg excluder in schabetg pli grond en in onn u ils proxims onns», ha ditg Stefan Schneider, geolog da la firma CSD Ingenieure AG da Tusaun.

audio
Bunura: La vischnanca d'Alvara ha infurmà davart l'evacuaziun en cas urgent
ord Actualitad dals 21.06.2019.
laschar ir. Durada: 3 minutas 51 Secundas.

Bova pudess glischnar fin en il flum Alvra

Per quest schabetg pli grond è vegnì elavurà in plan d’evacuaziun. Quel vala per tut ils abitants da Brinzauls, e per ina part dals abitants da Vazerouls, Casti e Surava. En ina broschura ch’è per mintga vitg autra, vegn declerà tge ch’igl è da far en in cas d’ina bova gronda, e nua ch’ins sto sa dischlocar per vegnir or da la zona da privel. Alarmads vegnan ils pertutgads cun in sistem da sms, sur l'app Alertswiss, sur sirenas localas e cun sirenas dals pumpiers e da la polizia.

Tenor Adrian Sommer da l’Uffizi da militar e protecziun civila Grischuna ch’ha elavurà il concept, saja ina bova pli gronda previsibla tranter 6 fin 15 uras avant la bova, uschia ch’era tar il «worst case» restass avunda temp per ils abitants da bandunar lur chasas. La responsabladad da decider in’evacuaziun è tar la vischnanca Albula/Alvra, ch’è en contact cun ils geologs che fan las mesiraziuns permanentas a Brinzauls.

RR actualitad 08:00

Artitgels legids il pli savens