Siglir tar il cuntegn

Header

video
Pretschs exagerads durant il WEF
Or da Telesguard dals 15.01.2024.
laschar ir. Durada: 2 minutas 40 Secundas.
cuntegn

Pretschs exagerads al WEF Stanzas per 20'000 francs per notg: Quai saja il martgà liber

L’Uniun da hotel e gastronomia da Tavau ha ina cunvegna interna: Quella prevesa ch'ils pretschs pon s'augmentar durant il WEF per 30 fin 40% en congual cun ils pretschs dals dis da Festa. Dentant betg tuts sa tegnan vi da quai.

Sin intginas plattafurmas chattan ins adina puspè pretschs exorbitants per stanzas ubain per butias. Quai na plascha betg a Tamara Henderson, la presidenta da l'Uniun da hotel e gastronomia. Tals pretschs na possian ins betg giustifitgar – er betg cun ina preschientscha da 24 uras.

L’uniun na possia però far nagut encunter talas «nursas nairas». L’unic che l’uniun fa, è da betg resguardar tals hotels per organisar eveniments dal WEF.

Reputaziun patescha

Sche singuls porschan stanzas per 20’000 francs per ina notg ubain in Hotdog per 40 francs, saja quai il martgà liber, declera Tamara Henderson. Segund ella è il problem ch'i dat persunas che sajan prontas da pajar mintga pretsch da fantasia. Quai mettia er en malura la reputaziun dals hoteliers e hotelieras da Tavau. Ils pretschs exorbitants fetschian svelt la runda en las medias e svelt hai lura num ch'ils hoteliers sajan «profiteurs».

Tenor Tamara Henderson sajan quai dentant mo singuls hotels che fetschian maldiever da la situaziun. La gronda part da lur commembers sa tegna vi da las directivas.

RTR Telesguard 17:40

Artitgels legids il pli savens