Siglir tar il cuntegn

Header

La vischnanca da Filisur
Legenda: Il projec da fusiun da Bravuogn e Filisur (foto), vegn accumpagnà da l'uffizi da vischnancas. RTR, F. Belotti
cuntegn

Grischun Central Pro Filisur è sceptica envers fusiun

La gruppa d’interess Pro Filisur, che vul s’engaschar per ils interess da Filisur tar la fusiun cun Bravuogn, è sa radunada l’emprima giada la mesemna. Ella ha ussa formulà pretensiuns.

Sco quai che l’iniziant da la Pro Filisur Hans-Jakob Schutz scriva en ina communicaziun a las medias, duai la votaziun ch’è planisada la primavaira, vegnir spustada sin pli tard, per pudair garantir in scleriment serius, quai che pertutga dumondas avertas. Tenor Schutz hajan 30 interessads visità l’occurrenza da la mesemna. Quai saja tenor el in cler signal, ch’ils da Filisur veglian infurmaziuns pli concretas en differentas spartas, surtut davart las finanzas. I sa mussia, che Filisur saja plitost critic envers la fusiun. Quai haja per part era da far cun las experientschas fatgas cun l’organisaziun da turissem cuminaivla. Era il num da la nova vischnanca saja vegnì discutà conscienziusamain. Qua duai dar la varianta Ela u Bergün-Filisur.

Votar il pli tard il zercladur

Sco quai che l’accumpagnader da la fusiun Simon Theus da l’uffizi da vischnancas ha ditg envers RTR, saja in spustament da la votaziun da fusiun pussaivel. Il pli tard il zercladur da quest onn stoppia dentant vegnir votà, sche la nova vischnanca duai ir en vigur sin l’entschatta dal 2017.

Artitgels legids il pli savens

Scrollar a sanestra Scrollar a dretga