Dapi il 2005 ha Lai organisà cun success 5 giadas il final da la cuppa mundiala da skis - mintgamai il mars. La davosa giada è quai stà il cas il 2014. Il comité d’organisaziun cun Silvano Beltrametti a la testa aveva inoltrà a la FIS la candidatura per organisar il 2017 ed il 2019 danovamain il final.
Nus essan pli che be dischillus da la FIS.
Da la FIS ha il comité d’organisaziun lura retschet intgins segns positivs cun la conferma che Lai haja las premissas per danovamain organisar il final. A chaschun da la radunanza generala da l’Uniun cuppa mundiala Lai, ha il president Heini Hemmi communitgà che la FIS haja risguardà per il final dal 2017 Aspen (USA) e per il 2019 Soldeu (Andorra). «Nus essan pli che be dischillus da la FIS», ha ditg Heini Hemmi.
Per tuts saja questa novitad da la FIS stada ina vaira frida. Sco quai che Silvano Beltrametti ha ditg, haja la FIS autras prioritads cun l’inteziun dad organisar il final da la cuppa da skis adina en in auter lieu.
RR novitads 06:00