Siglir tar il cuntegn

Header

Navigaziun

Visualisaziun dal project.
Legenda: Emprim'impressiun dal project dal ressort cun ils cubus brins – ina visualisaziun sin la pagina en la rait da la vischnanca da Zollikon. https://www.zollikon.ch/akutelleprojekte/15077
cuntegn

Project da ressort Lai Giasts da luxus empè da scolars – project d'hotel da 100 milliuns

La vischnanca da Zollikon vul far or da sia chasa da vacanzas «Sanaspans» a Lai in ressort da quatter stailas. Quai rapporta la gasetta Südostschweiz.

Dapi il 1963 posseda la vischnanca da Zollikon a Lai ina chasa da vacanzas – il «Sanaspans» en la localitad da Sundroina. Quai ch'era pli baud in lieu popular cun visitas regularas è uss vegnì in cas da sanaziun.

Dals scolars als giasts da luxus

Perquai è Zollikon ì sur ils cudeschs ed ha elavurà – tenor la publicaziun dal project, il link avra en ina nova fanestra en la rait – en collavuraziun cun ils responsabels da la vischnanca da Vaz il project «Hotel Sanaspans». Sin basa dad in studi davart la realisabladad è resultà in project da dimensiuns impressiunantas.

El sa cumpona dad 8 abitaculs cun in hotel ed abitaziuns explotadas cun total 500 letgs ed in spazi d'abitar da 14'000 meters quadrats.

En la preschentaziun dal project en la rait sa mussa la vischnanca da Zollikon persvadida:

Il project d’hotel persistent cun schanzas da crescher per il turissem cumpiglia tant effects positivs per la mastergnanza locala sco er impuls impurtants per stgaffir novas plazzas da lavur en la regiun da Lai / Valbella.
Autur: cussegl communal Zollikonconcept «Project da svilup Sanaspans, Lai»

Proxim pass per la realisaziun il mardi saira

La realisaziun sa cumpona dad ina seria da differents pass: Sin la pagina en la rait è da chattar il concept tar il «project da svilup Sanaspans, Lai». La planisaziun sin basa dad in studi da realisabladad è fatga e pronta.

Ussa è la balla tar Vaz. Per pudair realisar il project vul i uss ina seria da midaments da prescripziuns. Tranter auter in midament parzial da la planisaziun locala per pudair adattar la via d'access e per midar terren agricul en zona da fabrica adattada.

Questa saira ha la radunanza communala da decider dal midament parzial da la planisaziun locala. L'exposiziun da cooperaziun publica era gia dals 17 da matg fin ils 17 da zercladur.

RR actualitad 17:50