La vischnanca da Surses beneventass la construcziun da novs letgs chauds a Savognin. Leo Thomann, il president communal da Surses, ha anc adina la speranza ch'il ressort da vacanzas – ch'è gia pendent pli ditg – possia vegnir realisà pli spert, uschia ch'ins pudess entschaiver a bajegiar quel l'atun.
Ils recurs ch’èn vegnids fatgs cunter l'hotel ed il ressort da vacanzas, derivan da possessurs da segundas abitaziuns che cunfineschan cun il ressort da vacanzas ed il hotel planisà. Tranter auter vegnia crititgà il concept da parcar, l’equipament da la via che maina tar l’hotel, ed era l’estetica dal bajetg.
Dischillusiun tar ils patruns da construcziun
Sin dumonda da RTR ha ditg Marcel Friberg, il manader da fatschenta da la Resalpina GmbH, ch’el deploreschia il recurs che saja vegnì fatg cunter la lubientscha da bajegiar dal ressort da vacanzas. Per quel fiss la finanziaziun stada garantida.
Marcel Winkler, il pledader dal project da Hotel da la Panorama Development SA ha ditg, ch’era els deploreschian il recurs cunter la lubientscha da bajegiar dal hotel, ins saja però anc adina da buna speranza da pudair construir l'hotel che vegniss manà da la firma Mövenpick SA. Per finanziar il project, saja ins anc adina an discussiun cun investiders pussaivels.
