Suenter in accident possian tut ils autos arder, ha ditg l'inspectur dals pumpiers Conradin Caduff. Per stizzar tals fieus dettia dentant differenzas. Stizzar in auto che va cun carburant giaja per regla pli spert che da stizzar autos che van cun battaria empè da benzin. Per stizzar in auto electric che arda dovria quai en general fitg bler’aua e fitg bler temp. I saja grev da stizzar ina battaria cunquai che quella s’envidia adina puspè. Per ils pumpiers na fiss in auto electric che brischia dentant betg in privel pli grond ch’in auter auto. Ma impurtant saja d’enconuscher autos electrics. I dettia tscherts puncts che sajan da resguardar perquai ch’els hajan battarias che van cun tensiun auta. Sur in program da computer possian ils pumpiers chattar ils detagls da mintga singul model.
Cuira ha gia intervegnì tar accidents
Tar ils pumpiers da Cuira haja quai ils davos trais onns dà tschintg intervenziuns tar accidents cun autos electrics u ibrids. So quai ch’il cumandant Hansjörg Erni ha ditg envers RTR, sajan quai tut stadas intervenziuns pli pitschnas senza brischaments. Ch’i dettia adina dapli autos electrics sin vias grischunas na vesa il cumandant betg sco problem: Tar autos che van cun carburant haja ins experientscha e cun autos electrics stoppian ins anc far dapli experientschas, ma sut il stritg na sajan ils autos electrics betg in privel supplementar.
Autos electrics ch'èn ars daventan in problem
In problem pudessi dar sch’in auto electric ch’ha brischà stoppia vegnir transportà davent, ha ditg Urs Rüedi che porscha in servetsch da depannar a Serneus. Pervi da motivs da segirtad saja impurtant d’avair en l’avegnir containers spezials che pon transportar davent segir autos electrics che sajan ars. Qua stoppian ils servetschs da depannar collavurar. Plinavant spera el sin sustegn dal maun public. Giu la Bassa dettia gia oz tals containers che possian vegnir duvrads per transportar davent autos electrics che sajan brischads, ha ditg Urs Rüedi.
