Savognin vuless puspè s'etablir en il sport da mountainbike sin pli aut nivel svizzer. Cun in masterplan vegn questa finamira persequitada ils proxims onns. Il vicepresident dal comité d'organisaziun Dino Bellini è da buna speranza che quai funcziuna. «Ils davos onns avain nus organisà cursas regiunalas – e cun organisar ussa il Proffix Swiss Bike Cup faschain nus in proxim pass» raquinta Bellini.
Legenda:
La passascha clav da la cursa da mountainbike.
RTR, Tona Poltera
Per Savognin n'èn cursas da nivel naziunal nagut nov. Tuttina n'èn ils davos 13 onns betg pli vegnidas organisadas cursas sin quest nivel. Per il club da velo Surses munta il Swiss Bike Cup in pass da cursas regiunalas cun 200 participantas e participants, tar in engaschi per 650 giuvenils ed atletas ed atlets d'elita.