Siglir tar il cuntegn

Grischun Central Radi da speranza per la chascharia Savognin

Dapi prest in onn è la chascharia cun butia a Savognin serrada. Anc avant Nadal è la reavertura da la butia da chaschiel, quai cun products regiunals e chaschiels da l’entira Svizra. L’auter onn duai era la chascharia puspè avrir. Concret è quai dentant betg anc.

La butia da chaschiel vegn puspè averta.
Legenda: La butia da chaschiel vegn puspè averta. RTR, Federico Belotti
Gion Plaz
Legenda: Gion Plaz. RTR, Federico Belotti

Sco emprim pass vegn averta la butia da chaschiel a Savognin. Duas persunas vegnan engaschadas per la vendita, il manader da la butia è Gion Plaz da Tinizong. El è emploià da la societad da purs da chascharia Savognin e conturn.

Damai ch’el ha gia fatg l’emprendissadi en la butia da chaschiel stettia fitg a cor ad el che la butia vegnia puspè averta. Impurtant saja però ch’ins possia en l’avegnir era puspè producir al lieu, ha l’um da 42 onns ditg envers RTR.

Reavertura da la chascharia il 2018?

Ils purs prevesan da puspè pudair producir chaschiel en la chascharia ch’è il mument serrada. Concret n’è però anc nagut. Luzi Steier, il president da la societad da purs da chascharia Savognin e conturn na po il mument betg anc dir sch’i grategia propi, da puspè avrir la chascharia.

Necessarias èn en mintga cas investiziuns. En la chascharia correspundia betg pli tut a las pretensiuns dad ozendi.

RR actualitad 07:00