A la radunanza communala ha la populaziun da Razén approvà unanimamain il budget dal 2023. Cun expensas da bunamain 7,7 milliuns francs resta in surpli dad 83'274 francs. Malgrà quest surpli restian las finanzas tendidas, scriva la vischnanca. Tenor il president Reto Loepfe stoppian ins far patratgs schebain i saja necessari d'auzar la taglia sin immobiglias da 1‰ sin 1,5‰. Il pe da taglia ha la radunanza laschà tar 120% da la taglia simpla chantunala.
L'avertura dal guaud è terminada
Cun ina via da guaud dad 8,5 kilometers ha la vischnanca meglierà l'access per nizzegiar il guaud. Vinavant duai quella via era sminuir il dumber da camiuns che viageschan tras il vitg – 300 pli pauc ad onn. L'avertura ha custà 5,6 milliuns francs, il chantun è sa participà cun 73%.
Il president ha ultra da quai era preschentà il nov lieu d'inscunter en cas d'ina mancanza d'electricitad. Quel sa chatta tar la chasa da scola en la «Sentupada».
