Suenter ch’igl ha dà problems per flora e fauna tras lavaders d’aur ha il suveran da Valragn approvà la lescha davart il lavar aur cun 43 encunter 7 vuschs e 5 abstenziuns.
Ils davos dus onns ins haja observà adina dapli persunas che lavan aur – spezialmain tar la sbuccada da l'aual Scholla en il Rain Posteriur e da nov er en il Rain. Cun pala e badigl vegnan fatgs donns per fauna e flora, ha Orlando Strub da la vischnanca Valragn detg vers RTR. Discurs ed admoniziuns n'hajan betg purtà fritg. Cun in scumond general da lavar aur sin il territori communal hajan ins ina basa legala e possia er controllar meglier.
Cun vesair negin avantatg ni in auter fatg positiv per economia u turissem haja la suprastanza elevurà la lescha che scumonda da lavar aur, conferma Strub. Da preschentar ina lescha saja er vegnì per part sco giavisch dals pestgaders e dal guardiapestga da l'Uffizi chantunal. L'aua è però en cumpetenza communala.
Ils lavaders d'aur dastagn tenor la lescha vertenta ir en il Rain. Uschia disturbian els era ils peschs. Il medem mument ston ils pestgaders per exempel il matg pestgar davant la riva, entant ch'ils lavaders d'aur dastgan ir en l'aua durant l'entir onn.
Approvà dus credits ed il quint annual
Sper la dumonda dal lavar aur ha la radunanza communala approvà cun ina cuntravusch in credit dad 1,46 milliuns francs per construir las punts e la via d'access per la revitalisaziun «Äbi». Il credit da planisaziun d'in mez milliun francs per il rempar Medels ha il suveran approvà unanimamain. Plinavant han ils da Valragn approvà il quint da l'onn passà. Quel serra cun in gudogn da bundant 270'000.