Rapport davart accident a Casti ha retard

Ils 13 d’avust da l’onn passà ha ina bova laschà sviar in tren da la Viafier retica – pliras persunas èn vegnidas blessadas ed in um è mort en l’ospital. Ussa, in onn suenter l’accident, manca anc adina il rapport detaglià da la confederaziun, che la viafier spetgava en l’emprima mesadad da l’onn.

In dals vaguns è sa fermà en il guaud sut ils binaris. Bild in Lightbox öffnen.

Legenda da maletgs: In dals vaguns è sa fermà en il guaud sut ils binaris. Keystone

Sco quai che Christoph Kupper dal Departament federal per ambient, traffic, energia e communicaziun ha ditg, haja il post ch’examinescha ils accidents (SUST), stuì laschar far ulteriuras expertisas meteorologicas e geologicas e suenter examinar quellas, quai haja duvrà dapli temp.

Probabel quest atun

Sco quai che Christoph Kupper ha ditg plinavant quinta el, ch’il sboz dal rapport da l’examinaziun po vegnir tramess entaifer in mais en consultaziun. Suenter hajan tuts in mais peda da pigliar posiziun. Reacziuns vegnian eventualmain integradas en il rapport e silsuenter po il rapport final vegnir dà liber da la cumissiun. Pir lura vegn il rapport fatg public. Probabel quest atun vegn il rapport publitgà a las medias.

Accident ha custà 1.1 milliuns francs

Cler è gia ussa quant ch’il grev accident d’avant in onn a Casti ha custà enfin oz: numnadamain 1.1 milliuns francs. Sco quai che la Viafier retica ha ditg sin dumonda, surpiglia la segiranza 200’000 francs, 900’000 francs sto pajar la viafier.

Ils custs sa cumponan suandantamain:

  • 160’000 francs per spendraments ed assistenza da clients
  • 400’000 francs per salvament e reparaturas dal material rullant
  • 230’000 francs per rumagiar il lieu da l’accident, reparar ils vaguns e la locomotiva ed ils servetschs da bus
  • 380’000 francs per remplazzar material rullant.