La regenza na fa nagin recurs cunter la sentenzia pertutgant la vischnanca da Schmitten. Quella aveva decis l’atun 2019 da terminar il partenadi cun sias vischnancas vischinas en il sectur da scola en la Val d’Alvra e da laschar instruir ils uffants en l’avegnir en la vischnanca da Tavau. La regenza era da l’avis che quai saja critic per las scolas en la regiun ed ha obligà la vischnanca da Schmitten da restar en ils consorzis da scola da fin qua.
L’avrigl da quest onn ha la Dretgira administrativa decis che l’autonomia communala da Schmitten saja pli impurtanta che la scola cuminaivla en la val. Tenor l’avis da la regenza na po il chantun betg far recurs tar il Tribunal federal. Ella appellescha uss cunzunt a la vischnanca da Tavau da betg flaivlentar il spazi funcziunal existent en Val d’Alvra.