Siglir tar il cuntegn
cuntegn

Grischun Central Regio Viamala cun grond deficit il 2014

La radunanza regiunala da la Regio Viamala ha approvà mesemna saira il quint dal 2014. El serra cun in minus da 211'127 francs. Il deficit vegn purtà da las vischnancas.

Thomas Bitter, il president da la Regio Viamala ha manà tras la radunanza da mesemna saira.
Legenda: Thomas Bitter, il president da la Regio Viamala ha manà tras la radunanza da mesemna saira. RTR, F. Belotti

Sco quai che Thomas Bitter, il president da la Regio Viamala ha ditg, hajà il grond deficit differentas raschuns. Uschia haja il secretariat fatg in deficit da 39'447 francs, perquai che ord mancanza d’in mainafatschenta hajan ins pudì far damain lavurs, e pervi da sururas haja quai dà custs da persunal pli auts. La curatella professiunala ha fatg in deficit da 171'680 francs. Tenor Thomas Bitter haja era la curatella professiunala gì custs da persunal pli auts, ed igl hajan mancà daners da clients.

Regiun Viamala remplazza Regio Viamala

Plinavant è vegnì infurmà davart la nova Regiun Viamala che remplazza la Regio Viamala l’auter onn. 15 vischnancas hajan ditg gea als novs statuts, ina vischnanca ha refusà ils statuts e 9 stoppian anc vuschar en chaussa. Malgrà che betg anc tuttas vischnancas han approvà ils statuts, po la Regiun Viamala ir en vigur sin l’emprim da schaner 2016, cunquai ch’i tanscheva che 13 vischnancas dian gea als statuts.

Ils presidents communals da la Regio Viamala han suttascrit il contract davart la strategia Grischun 2030.
Legenda: Ils presidents communals da la Regio Viamala han suttascrit il contract davart la strategia Grischun 2030. RTR, F. Belotti

Suttascrit cunvegna davart Agenda Grischun 2030

A la fin da la radunanza han ils presidents communals suttascrit la strategia da svilup en connex cun l’Agenda Grischun 2030. La regiun Grischun Central ha gia suttascrit la strategia ils 28 da matg. La strategia da svilup serva sco directiva ed instrument da lavur per la conferenza dals mastrals, l’organ da direcziun da la nova regiun. L’Agenda Grischun 2030 è l’offensiva economica politica da l’Uffizi per economia e turissem Grischun, ensemen cun las regiuns.