Enfin che la revisiun parziala da la lescha per promover il svilup economic en il chantun Grischun na saja betg sut tetg, na fetschia nagin senn, da scriver ora la plazza vacanta dal sviluppader regiunal. Quai ha ditg Simon Willi, il parsura da la conferenza dals presidents communals da la regiun Alvra.
Il mument ins na sappia numnadamain betg, sco questa plazza vesia ora en l’avegnir. A la sessiun dal zercladur èsi previs, ch’il Cussegl grond vegn a tractar la fatschenta. Tenor il messadi da la regenza, pudess la lescha surlavurada ir en vigur sin l’entschatta da l’auter onn.