Siglir tar il cuntegn

Header

cuntegn

Residenza Grava Grond interess per las 32 abitaziuns a Savognin

La vendita da las 32 abitaziuns e 71 parcadis sutterans da la nova Residenza Grava a Savognin ha entschet. Per circa la mesadad da las abitaziuns datti gia reservaziuns.

Vendidas vegnan emprimas abitaziuns, abitaziuns administradas sco era segundas abitaziuns. Cunquai che las abitaziuns fan part al project dal hotel Jufa ch’è gia en funcziun, èsi pussaivel da construir circa 20% abitaziuns da vacanzas.

Sco che Roberto Guetg da la firma Immobiglias Plaz ha ditg envers RTR, saja qua in grond interess surtut per las segundas abitaziuns. Ma era las emprimas abitaziuns sajan dumandadas. Pli gronda saja la sfida da vender las abitaziuns che han in obligatori da dar a fit. Ma cunquai che quellas abitaziuns custan pli pauc ed igl è in nov sistem sin la fiera, è el persvadì ch’era quellas vegnan ad esser dumandadas. Enfin ussa sajan las abitaziuns gnanc anc publitgadas sin ils gronds portals d’immobiglias, mabain mo offrì a clients interns.

audio
Interess per las 32 abitaziuns da la Residenza Grava
ord Actualitad dals 11.11.2022. Maletg: RTR
laschar ir. Durada: 2 minutas 52 Secundas.

Uffer bajegia

Fabritgads vegnan las abitaziuns da la Firma Invias, in'interpresa da la firma Uffer da Savognin. Sco quai che Enrico Uffer, il manader da fatschenta ha ditg, saja el led ch’ins possia proximamain realisar il project cun las abitaziuns administradas, che sajan il davos pass aifer l’entir project turistic en il center da Savognin.

En tut vegnan investids 21 milliuns francs. Per distgargiar la Uffer ha la firma da Savognin chattà in investider, quai è la Mica Real Estate da l’investider Michael Hartweg ch’è enconuschent sco promotur da l’Arena da biatlon da Lantsch. Il matg dal 2023 duessan las lavurs entschaiver. A partir dal december 2024 duessan las abitaziuns lura esser prontas.

RTR actualitad 12:00

Artitgels legids il pli savens