La firma Resalpina, ch’ha gia construì a Breil il resort da vacanzas Pradas, vul construir sur la spunda dal Lai Barnagn a Savognin in resort da vacanzas cun 80 abitaziuns administradas en sis chasas. Davart ils investiders na sappian ins anc dir nagut per il mument ha ditg Marcel Friberg, il manader da fatschenta da la Resalpina.
Dumonda da bajegiar da l'hotel suonda
Gist dasper il ressort da vacanzas planisà duessi dar, en in segund project ch’è independent dal ressort, in hotel da quatter stailas cun 240 letgs che vegniss manà da la gruppa d'hotels Mövenpick. Sco quai ch’il sviluppader dal project Andreas Winkler da la firma Panorama Development ha ditg, vegnia era la dumonda da bajegiar per l'hotel inoltrada anc l’entschatta da quest atun. Era per l'hotel planisà na datti actualmain naginas infurmaziuns davart investiders pussaivels.
RR novitads 06:00
