Siglir tar il cuntegn

Header

cuntegn

Grischun Central Retard dal center da sport da naiv a Lai trumpescha

Il Grischun sto para spetgar anc onns sin il center naziunal per sport da naiv. Il cusseglier guvernativ dal Grischun, Martin Jäger, è trumpà da la decisiun da la Confederaziun.

audio
Martin Jäger è trumpà da la decisiun da la Confederaziun
ord Actualitad dals 28.12.2015.
laschar ir. Durada: 1 minuta 7 Secundas.

Sco quai che la NZZ am Sonntag scriva, vul il Departament per defensiun realisar il project pli tard che planisà.

Fin ussa eran emprimas investiziuns planisadas l'onn 2019. Ils daners na bastian però betg per realisar tut ils projects en ina giada, ha ditg il schef partent dal departament, Ueli Maurer. Prioritad han ils centers da sport existents a Magglingen e Tenero. Da nov duain ils daners star a disposiziun pir a partir dal 2023.

Cun champs da skis e cus da giuventetgna e sport duai il center planisà puspè pussibilitar a dapli giuvenils da far sport d’enviern. Associaziuns da sport duain pudair trenar en il center per il sport d’enviern.

Grischun n'è betg cuntent, ha dentant chapientscha

Il chantun Grischun n’è betg intgantà da quest svilup. Ins enconuschia la situaziun finanziala da la Confederaziun. Uschia saja quai chapaivel, ch’i na dettia betg il medem mument daners per tuts projects, da ditg Andrea Stadler dal Departament chantunal per educaziun e cultura. Perquai spetgia il chantun dentant, ch’il center vegnia lura er construì en questa segunda prioritad.

Sche, nua e cura ch’il center vegn bajegià – quai ha il parlament la finala da decider.

RR novitads 06:00

Artitgels legids il pli savens