L’onn 1991 han Roman Brenn e Reto Schircks gì l’idea, da fundar l’Uniun Turistica Stierva. L’idea saja stada, da pudair realisar tscherts projects, di Reto Schircks, il president partent. Uschia haja l’uniun pudì realisar divers projects en tuts quests onns. Sendas da viandar, publitgar broschuras, manar il runal d’uffants e far pista e loipas, tut quai èn affars che vegnan organisads da l’uniun turistica. Quella dumbra il mument 110 commembras e commembers, exact la mesadad èn dunnas. Sco quai che Schircks ha ditg envers RTR, saja el losch, che l’uniun n’haja suenter sia fundaziun mai fatg debits. Mintg’onn ha l’uniun turistica in preventiv da passa 10'000 francs. Quels derivan da la vischnanca Alvra, e da las contribuziuns da commembranza.
