Origen e l'Universitad da Son Gagl collavuran regularmain gia dapi il 2016. En il rom dal studi da context ha lieu mintg'onn in curs intensiv a Riom. Studentas e students da master da differents studis s'occupan – a l'exempel dad Origen – da la planisaziun e la realisaziun d'in festival cultural. Ellas ed els examineschan l'effect da l'iniziativa culturala e gidan da concepir projects futurs cun lur lavurs da studi. Per finir il curs dastga Origen sco «Artist in Residence» interpretar en moda multifara il SQUARE a Son Gagl.
I vegn era sautà
L'emna da studi cun 14 studentas e students sin il stgalim da master ha lieu dals 8 fin ils 13 d'avrigl 2024 a Riom. En quatter gruppas s'occupan las studentas ed ils students quest onn dals suandants temas:
- excellenza, prestaziun maximala – ed ils chars raps;
- Festival da cultura – in start-up per adina?;
- Origen e ses contexts;
- Mulegns tranter reanimar e chattar nov.
Durant il di cumenzan ils students mintgamai cun in lavuratori da sautar cun il choreograf e sautunz Robert Robinson – lur ovra da saut «The Artist's Way» vegn alura er preschentada la fin d'avrigl al SQUARE da l'Universitad da Son Gagl.