Dumengia avantmezdi ha in’ auto-rulotta brischà en in tunnel da l’A13 tar Rongellen en la Viamala. Sco la Polizia chantunala scriva, era l'automobilsta da 48 onns cun sia famiglia cun l’auto-rulotta en viadi da Tusaun en direcziun sid cura che l’incident è capità en il tunnel Crapteig. L'automobilista ha tuttenina constatà che l'auto è vegnì pli plaun e lura è vegnì fim en l'interiur. Per in curt temp hai schizunt dà fieu en il spazi da motor. Tuts han pudì bandunar l'auto segiramain. Ina persuna ha il salvament dal Grischun Central transportà en l'ospital perquai ch'ins ha suspectà in'intoxicaziun da gas da chamin.
Pervi da l’auto-rulotta hai dà gronds impediments da traffic. L’entir traffic da l’A13 è vegnì svià per passa in’ura sur la via chantunala tranter Tusaun sid ed Andeer.
